असे अनेक नियम संकेत शुद्रांना पूर्वीपासून आजही लागू आहेत आणि हे संकेत नियम मोडल्यास तो धर्माचा अपमान आहे हे कारण देवून उच्चवर्णीय लोक शुद्रांवर हल्ला करतात, त्यांना बेदम मारतात, ठार मारतात, त्यांच्या संपत्तीची नासधूस करतात, संपत्ती लुटून नेतात. आज भारतात जो अॅट्रॉसिटीचा कायदा आला आहे. तो याच नागरिक हक्कांचं संरक्षण करण्यासाठी आहे आणि तरीही सर्रास पूर्ण भारतभर शूद्रांवर याच नियमांचं पालन न केल्यास हमले, हल्ले होत असतात, त्यांना त्यांच्या सामान्य नागरिक हक्कांपासून वंचित केलं जातं. प्रसंगी त्यांना विष्ठा भरवली जाते, त्यांच्या आया-बहिणींवर बलात्कार केले जातात, त्यांना उभं जाळलं जातं, त्यांना धारदार शस्त्रांनी भोसकलं जातं, त्यांचे हातपाय तोडले जातात, त्यांना हर परीने नागवण्यात येतं. त्यांची नग्न धिंड काढण्यात येते, त्यांच्या झोपडया-वस्त्याच्या वस्त्या जाळण्यात येतात आणि बेचिराख केल्या जातात, त्यांच्या विहिरींमध्ये विष्ठा टाकली जाते. त्यांचा दाणा-पाणी बंद केला जातो, त्यांना गावातून हुसकावून लावण्यात येतं, त्यांच्या सगळ्या बाजूने मुसक्या बांधल्या जातात, त्यांचं जगणं मुश्किल करून टाकलं जातं. त्यांना कुठेही न्याय मिळणार नाही अशी परिस्थिती निर्माण केली जाते. या सगळ्या पार्श्वभूमीवर रामदास आठवले हे नाव या सगळ्या अन्याय अत्याचाराच्या विरोधात बंड करून अन्याय अत्याचाराला जशास तसं उत्तर देणारं नाव आहे. 

विरोधकांच्या मनात धडकी भरवणारं हे नाव आहे. विरोधकांना सळो की पळो करून सोडणारं हे नाव आहे. त्यांची दलित पँथर आणि त्यानंतर भारतीय दलित पँथरची चळवळ याच आधारावर उभी राहिलेली आणि लोकांचा भरघोस पाठिंबा मिळालेली चळवळ आहे. लोकांना न्याय मिळवून देण्यासाठी तयार झालेली ही चळवळ आहे. या चळवळी पासून गेली ४५ वर्षे रामदास आठवले तसूभरही बाजूला झालेले नाहीत. आजही अन्याय, अत्याचार झाल्यावर सर्वात अगोदर घटनास्थळी पोहोचणारा एकमेव नेता म्हणजे रामदास आठवले हेच आहेत. शुद्रांच्या सगळ्या जगण्यावर ब्राम्हणी तत्वज्ञानाने कब्जा केलेला आपण इतिहासात वर्तमानकाळात बघू शकतो. या विकृत ब्राम्हणी तत्वज्ञानाला फाट्यावर मारून शुद्रांचे नागरिक अधिकार त्यांना मिळवून देण्याची चळवळ म्हणजे आंबेडकरी चळवळ. याच चळवळीला पुढे नेण्याची जबाबदारी आठवले साहेबांनी आपल्या अंगावर घेतलेली दिसते.

आठवले साहेबांची भारतीय सामाजिक, राजकीय जीवनात एंट्री १९७२ ते १९७८ ला झाली… आणि तेव्हापासून आज २०२३ पर्यंत जवळ जवळ ४५ वर्षे आठवले साहेब आपल्या संपूर्ण मानसिक, शारीरिक, भावनिक, शैक्षणिक, सांस्कृतिक, आर्थिक, धार्मिक, सामाजिक, राजकीय ताकदीनीशी समाजामध्ये या अन्याय अत्याचाराच्या विरोधात सजग राहून सक्रिय राहून, जोमात काम करीत आहेत. त्यांच्या सगळ्या क्षमता, त्यांची सगळी समज, त्यांचे संपूर्ण आकलन त्यांनी या कामासाठी लावलेले दिसते आणि अगदी झोकून देवून ते आपले काम करत असताना आम्ही त्यांच्या सहवासातले कार्यकर्ते पाहत आहोत.